حوزہ نیوز ایجنسی کی رپورٹ کے مطابق، حسب سابق امسال بھی جامعةالنحف میں اجتماعی دعائے عرفہ کا پروگرام منعقد ہوا۔ دعائیہ پروگرام کا آغاز تلاوت قرآن مجید سے ہوا، جس کا شرف مشہور قاری سید محمد رضا الحسینی نے حاصل کیا۔
بلتستان کے معروف قاری مولانا حافظ محمد تقی ذاکر نے دلنشین انداز میں دعائے عرفہ پڑھی۔
انہوں نے دعائے عرفہ کی اہمیت اور مطالب پر بھی روشنی ڈالی۔
حجة الاسلام سید محمد علی شاہ الحسینی نے حضرت مسلم بن عقیل کی شہادت کی مناسبت سے مصائب پڑھے۔
اس دعائیہ پروگرام میں علمائے کرام، مدارس، کالج، یونیورسٹی کے طلبہ اور دیگر شعبہ ہائے زندگی سے تعلق رکھنے والے مؤمنین نے کثیر تعداد میں شرکت کی۔
آخر میں ملک عزیز پاکستان کی سلامتی، رہبر معظم و مراجع عظام کی صحت و سلامتی، حجاج کرام کی سلامتی، مراکز دینی کی ترقی، شہدائے اسلام کی سربلندی، محسن ملت شیخ محسن علی نجفی ، بانی مدرسہ شیخ محمد عسکری نجفی، شیخ حافظ نوری اور جامعہ کے محسنین کے مرحومین کے بلندی درجات، بانیان و محسنین مدرسہ کی صحت و سلامتی، فلسطینی مجاہدین کی فتح و نصرت اور امریکہ و اسرائیل کی نابودی کے لیے دعا کی گئی۔
آخر میں زیارت امام حسین علیہ السلام کے ساتھ یہ روح پرور دعائیہ پروگرام اپنے اختتام کو پہنچا۔
